Во првиот тест ден на системот „Safe City“ во Скопје, камерите регистрирале дури 110.000 сообраќајни прекршоци, што значи околу 77 прекршоци во минута. Најголем дел, околу 90%, се за прекумерна брзина, а над 5.000 прекршоци биле за поминување на црвено светло.
Министерот за внатрешни работи, Панче Тошковски, изјави дека системот е во фаза на консолидација и целосно ќе почне да се применува од 1 јануари. Тој додаде дека се разгледува можноста за толеранција од 10% над ограничувањето на брзината, по примерот на некои европски земји, додека за службените возила нема да има никаква толеранција, освен за Брза помош, Пожарна и специјални придружби.
Тошковски посочи дека возилата со странски регистарски таблички нема да можат да влезат во Македонија додека не ја платат казната за прекршокот. „Системот не е совршен и ќе има елементи кои ќе треба да се коригираат“, додаде тој.
Проектот се тестира во Скопје, Куманово и Тетово, како и на Коридор 10 и Коридор 8, а во наредните денови ќе се активира и на автопатите. Целта е до средината на 2026 година сите градови во државата да бидат опфатени со „Safe City“.
Премиерот Христијан Мицкоски истакна дека прифаќа критики за системот, но дека главната цел е намалување на бројот на жртви во сообраќајот. Во 2024 година загинале 142 лица, што е далеку над просекот во ЕУ, каде годишно умираат 45 лица на еден милион жители. Властите имаат амбиција до 2050 година да го сведат бројот на загинати на нула.
