Премиерот Христијан Мицкоски денеска соопшти дека владиниот авион ќе биде ангажиран за евакуација на неколку македонски граѓани кои се наоѓаат во Израел, каде што безбедносната состојба се влошува. Тој посочи дека секојдневно е во контакт со министерот за надворешни работи и трговија, Тимчо Муцунски, и дека се подготвува план за пренесување на заробените македонски државјани во безбедна земја, најверојатно Египет.
„Во моментов има девет граѓани и очекувам евакуацијата да заврши до утре“, изјави Мицкоски.
Министерот Муцунски на прес-конференција објави дека вкупно 28 македонски државјани побарале евакуација, а осум од нив, меѓу кои и четири деца, се очекува најдоцна утре да пристигнат во Скопје преку Египет, придружени од безбедносен конвој.
„Веднаш по ескалацијата на состојбата, преку амбасадата во Израел започнавме активности за евакуација и формиравме кризен штаб. Втората група ќе се евакуира веднаш по воспоставување на редовен авионски сообраќај од Тел Авив“, додаде Муцунски.
Министерството апелира до сите македонски граѓани кои се наоѓаат во Израел и Иран, да се обратат за конзуларна помош на достапните СОС телефонски броеви и да избегнуваат патувања во регионот додека трае кризата.
За асистенција и поддршка граѓаните можат да се обратат на:
Амбасада на РС Македонија во Тел Авив: +972 54 500 8566 / +972 54 967 0546, [email protected]
Министерство за надворешни работи и надворешна трговија: +389 75 273 732 / +389 75 268 736, [email protected]
Кризниот штаб во МНР е активен 24 часа дневно за да ја следи ситуацијата и да им помогне на македонските државјани во погодениот регион.
