Нов голем успех за македонската математика! Младите математичари кои ја претставуваа Македонија на 67. Интернационална математичка олимпијада (ИМО) во Шангај, Кина, освоија еден златен и три бронзени медали во конкуренција со 680 натпреварувачи од 120 земји.
Највредното одличје – златниот медал, го освои Дамјан Давков од Штип, еден од најуспешните млади македонски математичари. Со бронзени медали се закитија Ивано Божиновски, Андреј Тасиќ и Леонид Тодороски.
Од Амбасадата на Народна Република Кина во Скопје им упатија честитки на младите математички надежи, посакувајќи им уште многу успеси и достигнувања во иднина.
Македонската екипа беше примена и во Амбасадата на Македонија во Пекинг, каде амбасадорот Сашко Насев им посака добредојде и успех.
Успехот на младите математичари го сподели и Никица Давкова, мајката на Дамјан, која информираше дека пофалница освоил Филип Калкашлиев, а успешно учество имал и Марко Митевски. Тим лидер е Марко Петрушевски, а заменик-лидер Алексиј Тасиќ.
Ова е уште еден во низата големи резултати на македонските математички таленти. На Европската математичка олимпијада во Вилнус годинава, Дамјан Давков освои златен медал, Ивано Божиновски сребрен, а Леонид Тодороски бронзен медал. Давков во мај го освои и првото место на Балканската математичка олимпијада во Солун, каде се закити со уште едно злато.
Македонските ученици повторно покажаа дека се меѓу најдобрите млади математичари во светот.
