Почина Норма Нолан, единствената Мис Универзум од Аргентина
Норма Нолан, единствената жена од Аргентина која ја освои титулата Мис Универзум, почина на 20 август на 87-годишна возраст, објавија специјализирани портали за натпревари за убавина.
Родена во Венадо Туерто, со ирско и италијанско потекло, Нолан ја освои титулата Мис Универзум на 14 јули 1962 година во „Miami Beach Auditorium“ пред 7.000 гледачи, на возраст од 24 години. По ова достигнување, патуваше низ Аргентина на национална турнеја и учествуваше во рекламни кампањи.
По завршувањето на обврските како Мис Универзум, се врати во Буенос Аирес и продолжи кариера како модел. Во 1966 година се омажи и доби ќерка. Неколку години подоцна учествуваше како член на жирито на изборот за Мис Универзум, а потоа се повлече од јавниот живот и живееше приватно во Мајами.
Организацијата Мис Универзум преку својот официјален Инстаграм изрази сочувство до семејството и пријателите, истакнувајќи дека нејзината убавина, елеганција и пионерски дух оставиле траен впечаток и инспирирале генерации.
