Битола вечерва ќе биде центарот на музичкиот свет – на Градскиот стадион „Петар Милошевски“ настапува една од најголемите светски ѕвезди на електронската музика, холандскиот диџеј Армин ван Бурен.
Настанот, организиран од Авалон продукција со поддршка на Општина Битола, е дел од програмата Bitola OpenAir и се најавува како најголемиот музички спектакл ова лето во Македонија. Илјадници посетители од цела земја и регионот пристигнуваат во Битола за да присуствуваат на шоуто на еден од највлијателните DJ артисти на сите времиња.
Сцената е веќе поставена, а светлосната и визуелната продукција ветуваат вечер исполнета со музика, енергија и незаборавна атмосфера. Армин ван Бурен, познат по своите динамични сетови и иновативни настапи, вечерва ќе донесе светски звук во срцето на Битола.
Организаторите најавуваат целосно аудиовизуелно доживување, на ниво со најголемите светски фестивали. Програмата започнува во раните вечерни часови, а настапот на Армин се очекува во главниот термин.
Овој концерт се смета за културен настан од меѓународно значење и дел од пошироката стратегија за развој на културниот туризам во Битола. Градот, ден по Илинден, го доживува својот најголем музички момент во поновата историја.
