Полицијата во Тетово ноќеска го лишила од слобода 47-годишниот Ј.С. од Тетово, кој управувал возило со неверојатни 3,94 промили алкохол во крвта и предизвикал сообраќајна незгода.
Инцидентот се случил околу 01:30 часот на булевар „Маршал Тито“ во Тетово, кога возилото „Форд“ со тетовски регистарски таблички, управувано од Ј.С., се судрило со автомобил „Ауди“ со хрватски национални ознаки. Во незгодата била причинета само материјална штета.
При интервенцијата, полициските службеници утврдиле дека возачот е во тешка алкохолизирана состојба – со скоро четири промили алкохол во крвта.
Тој е задржан во полициската станица, а по целосно документирање на случајот против него ќе биде поднесена кривична пријава за „безобзирно управување со моторно возило“ согласно член 297-а од Кривичниот законик.
