Српската компанија PR-DC, во сопственост делумно на медиумскиот магнат Жељко Митровиќ, неодамна успешно го тестираше својот нов вооружен дрон под името ИКА-Бомбардер. Се работи за хексакоптер кој може да носи до 12 минобацачки гранати калибар 60 милиметри, наменет за прецизно и автономно дејствување на бојното поле.
Тестирањата, најверојатно извршени во воени центри во Србија, вклучуваа проверки на отпорност на вибрации, екстремни температури (од -40 до +70 °C) и електромагнетни нарушувања, што покажува дека дронот е прилагоден на воени стандарди кои ја надминуваат цивилната употреба. Исто така беше тестирана работа дневно и ноќно, со прецизна навигација и симулации на борбено гаѓање.
ИКА-Бомбардер е изработен од лесни, но издржливи материјали, вклучувајќи труп од епоксидна смола засилена со јаглеродни влакна, што му овозможува лет до 40 минути со терет од 20 килограми. Дронот може да работи целосно автономно или под контрола на оператор, носејќи вооружување со прецизно испуштање бомби на растојание до 10 километри.
Посебност на овој дрон е палењето со супербрзо делување на бомбите, со двојна безбедносна игла, чија експлозија има радиус од 10 метри. Може да летa до 30 километри, достигнувајќи брзина до 90 км/час, со одлична отпорност на ветер и способност за искачување од 10 метри во секунда.
Митровиќ нагласува дека овој дрон го штити животот на војниците, намалувајќи ја потребата за нивно присуство во опасни зони, додека неговиот партнер Милош Петрашиновиќ истакнува дека дронот е целосно развиен во Србија и претставува светла иднина на воената технологија.
ИКА-Бомбардер е позициониран како конкурентен производ на домашниот и меѓународниот пазар на воена опрема, способен за повеќекратни тактички задачи: извидување, прецизно гаѓање и автономни мисии во услови на високи барања, што го прави моќен адут во модерното војување.
