Пет лица, меѓу кои и двајца полициски службеници, се уапсени во Србија под сомнение дека биле дел од организирана криминална група која овозможувала нелегално преминување на државната граница и шверц на мигранти кон земјите од Европската Унија.
Акцијата е спроведена на територијата на Пирот, Бабушница и Сурдулица, по наредба на Јавното обвинителство за организиран криминал. Според истрагата, осомничените им помагале на мигрантите нелегално да ја преминат границата, привремено ги сместувале во близина на езерото Власина, а потоа организирале нивен понатамошен транспорт низ Србија кон државите на ЕУ.
Меѓу уапсените се тројца цивили и двајца полициски службеници – еден од Полициската станица во Пирот и еден припадник на Регионалниот центар на граничната полиција во Стразимировци.
Против сите приведени е поднесена кривична пријава поради сомнение за кривичните дела нелегално преминување на границата и шверц на луѓе.
Апсењата се резултат на повеќемесечна заедничка истрага на српското и бугарското Министерство за внатрешни работи, спроведена со поддршка на Европол. Во акцијата учествувале Службата за борба против организираниот криминал, Српската агенција за борба против корупцијата и Одделот за специјални операции на српската полиција, со цел разбивање на меѓународна мрежа за криумчарење мигранти.
