Вработените во Словенија годинава имаат право на задолжителен зимски регрес од најмалку 740,94 евра, што е за 102,08 евра повеќе од минатата година, пренесува „Дневник.си“.
Според владините податоци наведени во извештајот, зимскиот регрес изнесува половина од минималната бруто-плата. Со нејзиното зголемување расте и минималниот износ што работодавачите треба да им го исплатат на работниците.
Ова право е воведено како законска обврска во 2025 година. Целиот износ им следува на работниците што биле вработени во текот на целата година со полно работно време.
За лицата што работеле пократок период или со скратено работно време, по правило се исплаќа сразмерен дел, со предвидени законски исклучоци.
Редовниот рок за исплата е 18 декември, што значи дека средствата треба да пристигнат на сметките на работниците пред божиќните празници.
Зимскиот регрес, кој често се нарекува и божиќен надоместок, се разликува од дополнителната награда за деловен успех. Регресот е законска обврска, додека дополнителниот бонус може да зависи од правилата на компанијата, колективниот договор или постигнатите резултати.
Работодавачите можат да исплатат и повисок износ од законски утврдениот минимум.
