Обилните врнежи од дожд предизвикаа сериозни поплави во регионот Драч, каде состојбата се оценува како најкритична. Поради влошената ситуација, министерот за одбрана на Албанија, Пиро Венгу, синоќа го свика Комитетот за цивилни вонредни ситуации со цел координација на мерките за справување со последиците од невремето.
По состанокот, Венгу изјави дека поплавите и натаму претставуваат сериозен проблем, при што околу 800 домови се зафатени од водата, а 180 лица се принудени да ги напуштат своите домови поради безбедносни причини.
„Сите надлежни структури се на терен и состојбата се следи постојано, бидејќи опасноста сè уште не е помината“, соопшти Венгу преку социјалните мрежи.
Тој информираше дека силите за цивилна заштита, општинските служби и другите институции се целосно ангажирани за управување со кризата и за итна интервенција таму каде што е потребно.
Министерот упати апел до граѓаните да бидат внимателни и строго да ги почитуваат упатствата на службите за итни случаи сè додека состојбата не се стабилизира.
