Двајца браќа од Авганистан биле уапсени на аеродром во Хрватска додека се обидувале да се качат на лет за Германија. Полицијата утврдила дека тие влегле во Хрватска од Грција со фалсификувани хрватски лични карти.
Случајот го привлече вниманието и поради необичните имиња наведени во документите. Според информациите објавени од порталот „Далмација“, малолетниот брат користел лична карта на која стоело името „Крал Ладислав“, додека неговиот полнолетен брат имал документ на име „Кнез Трпимир“.
По приведувањето, полнолетниот брат бил изведен пред истражен судија на Окружниот суд, кој му одредил притвор поради опасност од бегство. Малолетникот бил сместен во Дом за деца и млади.
Според истиот извор, браќата фалсификуваните документи ги набавиле во Атина.
Случаи со фалсификувани документи на хрватската граница се регистрирани и претходно. Во февруари годинава, двајца државјани на Србија биле запрени во Илок со фалсификувани германски и хрватски лични карти. Утврдено било дека претходно нелегално влегле во Хрватска од Србија, а кај едниот бил пронајден и фалсификуван хрватски документ за управување возило.
Во февруари минатата година, 50-годишен српски државјанин се обидел да аплицира за хрватски пасош во Товарник со фалсификувана хрватска лична карта. Два месеци подоцна, во Бајаково бил откриен и 37-годишен државјанин на Србија кој на полицијата ѝ предал фалсификуван хрватски пасош. Неговиот вистински идентитет бил утврден со помош на српскиот пасош.
Според последниот годишен полициски извештај, во текот на 2025 година на хрватската надворешна граница биле откриени 199 фалсификувани документи и 26 случаи на употреба на туѓи документи.
Од вкупниот број фалсификувани документи, 71 биле пасоши, додека биле откриени и 67 фалсификувани печати. Податоците се однесуваат на документи од различни земји, а не само на хрватски документи.
