Американско-израелското лоби AIPAC, кое важи за една од највлијателните организации во Соединетите Американски Држави, изрази сериозна загриженост поради меморандумот за разбирање потпишан меѓу САД и Иран, оценувајќи дека документот отвора бројни прашања во пресрет на преговорите за конечен нуклеарен договор.
Во соопштение до јавноста, AIPAC посочи дека иранскиот режим повеќе од четири децении е во конфликт со САД и сопствениот народ, нагласувајќи дека американско-израелската соработка значително ги ослабнала иранските воени и нуклеарни капацитети.
Според организацијата, меморандумот предвидува олеснување на санкциите кон Иран во замена за отворање на Ормускиот Проток и нејасни обврски поврзани со иранската нуклеарна програма, што создава простор за различни толкувања.
Од AIPAC бараат американскиот Конгрес активно да биде вклучен во процесот и да има клучна улога во оценувањето на секој иден договор со Техеран. Тие сметаат дека конечниот договор мора трајно и проверливо да ја прекине иранската нуклеарна програма, да ги отстрани залихите на збогатен ураниум и да ги демонтира постројките за збогатување.
Дополнително, организацијата предупредува дека укинувањето на дел од санкциите може да му обезбеди на Иран значителни финансиски средства, кои според нив би можеле да достигнат милијарди долари месечно.
Загриженост е изразена и поради деловите од меморандумот што се однесуваат на прекин на воените активности во регионот. Според AIPAC, формулациите во документот би можеле да ги ограничат израелските операции против Хезболах и да влијаат врз постојните безбедносни договори меѓу Израел и Либан.
Меморандумот предвидува 60-дневен период за преговори за конечен нуклеарен договор, а реакцијата на AIPAC дополнително го зголемува политичкиот притисок врз администрацијата на американскиот претседател Доналд Трамп во однос на идните односи со Иран.
