Нова технологија на фронтот: украинските дронови сами координираат напади
Три украински дронови неодамна изведоа напад врз руски позиции, координирајќи се меѓусебно преку вештачка интелигенција – пример за тоа како „технологијата на ројот“ станува реалност на бојното поле.
Војни експерти велат дека ова е нова фаза во дрон-војувањето, бидејќи овозможува групи летала да делуваат како единствен систем. Украина, според извори, речиси една година рутински користи вакви операции, што ја става во водечка позиција во развојот на борбени дронови.
Технологијата е развиена од украинската компанија Swarmer, чиј софтвер им дозволува на дроновите да одлучат кој ќе нападне прв, да се прилагодат ако некој остане без батерија или ако се промени целта. Првично користен за поставување мини, системот денес се применува за гаѓање војници, опрема и инфраструктура. Според офицери на фронтот, технологијата е употребена над 100 пати.
Една типична операција вклучува извидувачки дрон и два вооружени со мали бомби. Тие сами ја одредуваат секвенцата на напад, што значително го намалува бројот на потребни оператори – наместо девет, се доволни тројца. Тоа за Украина претставува клучна предност во услови на помали човечки ресурси.
Иако овие мисии сè уште не претставуваат „полноправен рој“ со стотици дронови, аналитичарите велат дека дури и малата автономија е импресивна. Swarmer веќе подготвува тестови со над 100 дронови, а технологијата привлекува инвестиции и внимание од САД, Кина, Русија, Франција и Јужна Кореја.
