Соединетите Американски Држави го откажаа планираниот самит меѓу претседателот Доналд Трамп и рускиот претседател Владимир Путин поради тврдата позиција на Русија околу нејзините барања поврзани со Украина, објави Фајненшел Тајмс.
Одлуката, според извори на весникот, била донесена по напнат телефонски разговор меѓу највисоките дипломати на двете земји. Белата куќа засега не ја коментираше информацијата, а ниту руските власти не биле достапни за изјава.
Плановите за самит во Будимпешта овој месец биле одложени откако Москва останала цврсто при своите услови, меѓу кои и барањето Украина да отстапи дел од својата територија како предуслов за прекин на огнот. Трамп, пак, го поддржал повикот на Украина за веднаш да се воспостави прекин на огнот по постојните линии на фронтот.
Неколку дена по договорот Трамп и Путин да се сретнат во унгарската престолнина за да разговараат за можноста за крај на војната во Украина, руското Министерство за надворешни работи му испратило на Вашингтон официјален допис во кој ги повторило истите барања за решавање на, како што го нарекува Путин, „главниот корен на конфликтот“. Тие барања вклучуваат територијални отстапки, значително намалување на украинските вооружени сили и гаранции дека Украина никогаш нема да се приклучи на НАТО, наведува весникот.
По телефонскиот разговор меѓу рускиот министер за надворешни работи Сергеј Лавров и американскиот државен секретар Марко Рубио, во кој Рубио го известил Трамп дека Москва не покажува подготвеност за вистински преговори, САД донеле одлука да го откажат самитот, додава Фајненшел Тајмс.
Украинскиот претседател Володимир Зеленски изјави овој месец дека Украина е подготвена за мировни преговори, но нема намера да ги повлече своите трупи од дополнително ослободените територии, како што бара Москва.
