Украинците објавија снимка: “Погодивме руски брод”

Дрон на украинската воена разузнавачка агенција (ГУР) ја погоди повеќенаменската бродска единица на Црноморската флота на Русија во близина на Новоросијск, предизвикувајќи значителна штета, соопштија украинските власти.

Бродот од серијата „Project MPSV07“ бил следен и погоден додека извршувал извидување и патролирање во Новоросијскиот залив, во близина на Краснодарскиот крај, каде моментално се наоѓа Црноморската флота.

Украинските разузнавачи објавија црно-бела снимка на која се гледа моментот на ударот. „Како резултат на нападот, електронските разузнавачки системи на рускиот брод се уништени, а бродот е оневозможен и испратен на скапи поправки“, соопштија украинските власти.

Се наведува дека бродот, чија проценета вредност изнесува 60 милиони долари, бил пуштен во употреба во 2015 година. Според украинските извори, Русија поседува четири такви пловила, додека други извори тврдат дека постојат пет оперативни повеќенаменски спасувачки бродови од серијата „Project MPSV07“ и уште еден во изградба.

Едно од нив е „Спасател Демидов“, испорачан во 2015 година и регистриран во пристаништето Новоросијск. Според податоците од системите за следење на морски сообраќај, последната позната позиција на бродот била пред 77 дена, северно од рускиот полуостров Кола во Баренцовото море.

Во последните недели, украинските разузнавачи ги засилиле нападите врз руските воени објекти во регионот на Црното Море, вклучувајќи го и окупираниот Крим. Недавно биле погодени две радарски станици од руската противвоздушна одбрана на полуостровот.

Украина, според извори, со нападите со дронови и ракети успеала да уништи или оневозможи третина од руската Црноморска флота, меѓу кои десантниот брод „Цезар Куников“, патролниот брод „Сергеј Котов“, ракетната корвета „Ивановец“ и повеќе брзи десантни пловила.