Американски функционер и украинскиот советник за национална безбедност Рустем Умеров соопштија дека е постигнато заедничко разбирање за предлогот за завршување на војната.
Неименуван американски функционер изјави дека украинската влада „се согласила на мировен договор“ посредуван од администрацијата на претседателот Доналд Трамп за прекин на речиси четиригодишната руска офанзива.
Деталите сè уште се доразвиваат, но Умеров изрази оптимизам дека украинскиот претседател Володимир Зеленски би можел да отпатува во Вашингтон пред крајот на ноември за финализирање на договорот. „Украинците се согласија на мировен договор“, изјави американскиот функционер за Си-Би-Ес њуз, додавајќи дека остануваат некои мали детали за усогласување.
Веста се појавува во време кога американскиот секретар на армијата Ден Дрискол е во Абу Даби за средби со руски официјални лица, а засега нема реакции од Русија на договорот.
Претходно, рускиот министер за надворешни работи, Сергеј Лавров, оцени дека Европа ја пропуштила својата шанса со својот план.
