Американскиот претседател Доналд Трамп соопшти дека во последен момент е откажано патувањето на американската делегација во Пакистан, каде што требало да се одржат разговори поврзани со Иран.
Како што изјави во интервју за „Фокс њуз“, Стив Виткоф и Џаред Кушнер нема да заминат за Исламабад, иако претходно Белата куќа најави дека мисијата е планирана.
Одлуката за откажување следува по заминувањето на иранската делегација, предводена од министерот за надворешни работи Абас Арагчи, од пакистанскиот главен град. Разговорите требаше да придонесат за стабилизирање на ситуацијата по неодамнешните тензии и операцијата „Епски бес“.
Трамп истакна дека американската страна оценила дека нема реална основа за продолжување на патувањето и преговорите во тој момент.
„Нема смисла да се патува толку долго за разговори без конкретен резултат. Тие се тие што треба да дојдат кај нас“, изјави Трамп, додавајќи дека САД ја задржуваат силната преговарачка позиција.
Тој порача дека Вашингтон нема намера да вложува дополнителни дипломатски ресурси во процеси кои не носат брзи и конкретни резултати според американските услови.
