Првиот пациент кој ја прима руската персонализирана вакцина за лекување на меланом треба да ја заврши терапијата на почетокот на септември, соопшти Александар Гинзбург, академик на Руската академија на науките и научен директор на Националниот истражувачки центар за епидемиологија и микробиологија „Гамалеја“.
Според Гинзбург, последната доза од терапијата е планирана за почетокот на септември, со што ќе биде заокружен третманот на првиот пациент.
Станува збор за 60-годишен жител на регионот Курск, кој првата доза од вакцината „Неонковак“ ја примил во април годинава.
Лекот е развиен во Центарот „Гамалеја“, додека неговото производство се одвива во Рускиот национален медицински истражувачки центар за радиологија. Руското Министерство за здравство го одобри за клиничка употреба на почетокот на декември.
Според научниците, вакцината е персонализирана, односно се изработува индивидуално за секој пациент врз основа на молекуларните и генетските карактеристики на туморот.
Рускиот премиер Михаил Мишустин претходно најави дека ваквите терапии ќе бидат достапни за пациентите преку системот на задолжително здравствено осигурување во Русија.
Иако почетните резултати се охрабрувачки, ќе бидат потребни дополнителни клинички податоци за целосна проценка на безбедноста и ефикасноста на оваа персонализирана терапија.
