Необична сцена како од филм се одигра на плажа во местото Казуце, западно од Марина ди Рагуза на Сицилија, кога брановите почнале да исфрлаат вреќи полни со готовина. Капачите во неверување втрчувале во морето обидувајќи се да ги дофатат банкнотите, додека полицијата и крајбрежната стража брзо интервенирале и го обезбедиле подрачјето.
Според италијанските власти, инцидентот се случил на 28 јули, откако глисер долг околу 5,5 метри останал без гориво недалеку од брегот. Екипажот побарал помош, но при пристигнувањето на крајбрежната стража, лицата на пловилото наводно почнале да фрлаат вреќи со готовина во морето.
Морските струи ги однеле вреќите до брегот, каде што ги забележале бројни капачи. За неколку моменти плажата се претворила во хаос, а очевидци ги снимиле необичните сцени.
Полицијата и крајбрежната стража успеале да соберат речиси целата готовина, вклучително и делот што веќе бил изваден од капачите. Според првичните проценки, станува збор за сума од речиси 700.000 евра.
На глисерот, според информациите на истражителите, се наоѓале тројца полнолетни државјани на Малта и едно 13-годишно дете. Сите биле приведени на распит, а потоа пуштени да се бранат од слобода со мерки на претпазливост. Засега не е поднесено официјално обвинение.
Истрагата треба да утврди од каде потекнува големата сума пари и зошто била превезувана по оваа рута. Меѓу можните сценарија што ги разгледуваат истражителите се перење пари, криумчарење готовина, фалсификување банкноти или поврзаност со трговија со дрога, но италијанските власти нагласуваат дека во оваа фаза ниту една верзија не е потврдена.
Во меѓувреме, италијански истражувачки новинар објави тврдења за можниот сопственик на глисерот и негови наводни врски, но полицијата сè уште официјално не го потврдила идентитетот на сопственикот, ниту пак утврдила поврзаност на случајот со организиран криминал.
Истрагата продолжува.
