Словачка подготвува обновување на работата на меѓувладината комисија со Русија, која последен пат заседавала во 2021 година. Премиерот Роберт Фицо изјавил дека следната средба е закажана за 25 ноември во Москва, објавува „Политико“.
Според документ на руската влада во кој медиумот имал увид, разговорите треба да опфатат испораки на нафта, гас и нуклеарно гориво, но и соработка во културата, туризмот, земјоделството и заштитата на животната средина.
„Политико“ нагласува дека не можел независно да ја потврди автентичноста на документот, иако тој ги носи обележјата на веродостоен руски министерски материјал.
Во документот се наведува дека словачкиот министер за надворешни работи Јурај Бланар се согласил за одржување на состанокот за време на видеоповик со рускиот министер Валериј Фалков на 20 август. Првично биле предложени октомвриски датуми.
На прашањата за дневниот ред, словачкото Министерство за надворешни работи го упатило медиумот кон претходните изјави на Бланар. Тој порача дека Братислава одржува дијалог со државите заинтересирани за прагматична соработка во интерес на Словачка. Руското МНР не одговорило на барањето за коментар.
Енергетиката е меѓу главните теми на приближувањето. Според документот, словачката страна ја истакнала важноста на испораките на руска нафта преку „Дружба“ и на снабдувањето со нуклеарно гориво.
Фицо се противи на прекинот на увозот на руски енергенси, тврдејќи дека тоа би ги зголемило трошоците за земјата. Обновувањето на комисијата следува по неговата посета на Москва на 9 мај и средбата со Владимир Путин.
Според документот, на ноемвриските разговори би се разгледувале и статусот на Рускиот центар за наука и култура во Братислава и ограничувањата за учество на руските спортисти на меѓународни натпревари.
