Градските власти на Њујорк издадоа итно предупредување до граѓаните заради опасност од силни грмежи и изненадни поплави кои може да го погодат градот. Според Националната метеоролошка служба, се очекува поројна дождовна бура со интензитет до 7,5 сантиметри дожд за само еден час во одредени делови од градот, особено во попладневните часови во четврток.
Градоначалникот Ерик Адамс изјави дека сите градски служби се целосно мобилизирани и подготвени за интервенција. Агенцијата за управување со итни состојби ги повика граѓаните да избегнуваат патувања во следните 24 часа и да бидат подготвени за евентуална евакуација, особено оние чии домови често се поплавуваат.
„Секој жител на Њујорк треба да биде подготвен за опасни временски услови. Подгответе план, следете ги временските прогнози и реагирајте брзо при првиот знак на надоаѓање на вода, особено ако живеете под ниво на улица“, предупреди Зак Искол, комесарот за итни ситуации.
