Израелскиот премиер Бенјамин Нетанјаху објави дека Израел извојувал „историска победа“ во рамки на операцијата „Усправен лав“, по последните удари врз иранската територија. Тој изрази длабока благодарност до американскиот претседател Доналд Трамп, велејќи дека неговото вклучување било „досега невидено“ и од суштинско значење за успехот на операцијата.
„САД ја уништија иранската нуклеарна закана благодарение на дипломатската кампања што ја водевме заедно со министерот Рон Дермер“, изјави Нетанјаху. „Израел никогаш немал пријател во Белата куќа како претседателот Трамп.“
Во своето обраќање, премиерот тврди дека американските сили го уништиле подземниот нуклеарен објект во Фордо, додека израелската војска ги погодила иранските системи за балистички ракети и повеќето нивни лансери. „Ако Иран се обиде повторно да го обнови својот нуклеарен програм, ќе делуваме со иста решеност и сила за да го спречиме тоа“, порача тој.
Нетанјаху ја искористи приликата и да ја потврди позицијата на Израел кон ситуацијата во Газа: „Мора да го победиме Хамас и да ги вратиме нашите заложници.“
Оваа изјава доаѓа само неколку часа откако Доналд Трамп јавно го укори Израел поради наводно прекршување на договореното примирје со Иран, што дополнително ја усложнува политичката динамика меѓу двата сојузника.
