Авион на НАТО собори украински дрон над јужна Естонија, откако беспилотното летало влегло во естонскиот воздушен простор од правец на Русија, соопштија естонските власти. Инцидентот претставува најново зголемување на тензиите во балтичкиот регион поврзано со војната во Украина и активностите со беспилотни летала во близина на границите на членките на НАТО.
Естонскиот министер за одбрана Хано Певкур изјави дека по анализата на траекторијата било донесено решение дронот да биде соборен, бидејќи постоела проценка дека најверојатно бил насочен кон руски цели.
„Со оглед на траекторијата на дронот, одлучивме дека треба да го собориме. Најверојатно бил наменет да погоди некои руски цели“, изјави Певкур, додавајќи дека во акцијата учествувал романски борбен авион F-16 Fighting Falcon кој бил ангажиран во рамки на НАТО мисиите за воздушна безбедност во регионот.
Естонската армија соопшти дека дронот влегол во воздушниот простор на Естонија од територијата на Русија, по што бил следен и неутрализиран.
Министерот за надворешни работи на Естонија Маргус Цакана оцени дека ваквите инциденти се директна последица на руските активности и војната во Украина.
„Овие инциденти се директен резултат на војната и провокациите на Русија. Естонија ја зајакнува соработката со Украина за да ги засили своите капацитети за воздушна одбрана“, изјави Цахна.
Украинските власти, пак, негираа дека ги користат териториите на Естонија и Латвија за лансирање напади кон Русија и ја обвинија Москва за намерно пренасочување на украински беспилотни летала со помош на системи за електронско војување
Портпаролот на украинското Министерство за надворешни работи Ѓеорги Тихи изјави дека Русија користи електронски средства за да ги пренасочи украинските дронови кон балтичките земји.
„Русија продолжува да ги пренасочува украинските беспилотни летала кон Балтикот со употреба на уреди за електронско војување. Им се извинуваме на Естонија и на сите наши балтички пријатели за ваквите ненамерни инциденти. Нашите легитимни воени цели се наоѓаат во Русија и ние го користиме рускиот воздушен простор за да стигнеме до нив“, изјави Тихи.
