Полските служби ја проверуваат информацијата, Сикорски: Секое предупредување за тероризам го сфаќаме сериозно
Белоруското Министерство за надворешни работи ја предупредило Полска за можна терористичка закана на полска територија, а полските безбедносни служби сега ги проверуваат наводите, јавува Euronews.
Предупредувањето му било врачено на полскиот дипломат во Минск. Според соопштението на белоруската дипломатија, во четвртокот на разговор бил повикан полскиот отправник за работи во Белорусија, Кшиштоф Ожана, на кого му биле предадени информации за наводно планиран напад.
Мета наводно деца на активист
Во соопштението од Минск се наведува дека во случајот е вмешано лице со престојувалиште во Полска кое има криминално досие. Тоа лице неодамна го изгубило правото на дополнителна заштита и правото на престој во земјата.
Белоруските власти тврдат дека тоа лице планирало напад врз децата на белоруски активист кој живее во Полска. Како мотив се наведува одмазда, бидејќи активистот наводно не му помогнал доволно на осомничениот да го задржи правниот статус во Полска.
Министерството за надворешни работи на Белорусија соопшти дека е подготвено да ѝ достави на Варшава дополнителни информации доколку биде потребно.
Полска: Ја проверуваме информацијата
Полската новинска агенција побарала коментар од Јацек Добжински, портпарол на министерот-координатор за специјални служби.
„Не коментирам медиумски написи на таа тема. Сепак, можам да ве уверам дека полските служби не занемаруваат ниту еден загрижувачки сигнал и дека кон сите информации за можни закани пристапуваат со должно внимание и одлучност“, изјавил Добжински.
Тој додал дека специјалните служби вообичаено не зборуваат јавно за своите активности во рана фаза од истрагата.
На ситуацијата вчера во Варшава се осврна и полскиот министер за надворешни работи, Радослав Сикорски.
„Станува збор за информација стара само неколку часа и сè уште ја проверуваме. Се разбира, секое предупредување за тероризам го третираме сериозно и го подложуваме на проверка“, порача Сикорски.
