Русија и Белорусија во рамките на заедничките воени вежби „Запад“ вежбаат лансирање на руско тактичко нуклеарно оружје, соопшти белорускиот претседател Александар Лукашенко. Според државните медиуми, во вежбите учествувал и рускиот хиперсоничен проектил „Орешник“, кој беше тестиран минатата година во конфликтот со Украина.
Рускиот претседател Владимир Путин се појави во воена униформа и истакна дека околу 100.000 војници и 10.000 единици воена опрема учествувале во вежбите, со цел „да се обезбеди апсолутна заштита на суверенитетот и територијалниот интегритет“ на сојузот Русија–Белорусија.
Лукашенко нагласи дека таквите вежби се изведуваат на целата територија и дека користењето на тактичко нуклеарно оружје е „право на Белорусија и Русија“, додавајќи дека не планираат закана кон други земји.
Министерството за одбрана на Белорусија потврди дека дел од вежбите вклучувал лансирање на проектилот „Орешник“, а руската армија изведувала и вежби со стратешки бомбардери Tu-160, МиГ-31, морнарица, оклопни единици и дронови, како и тестирање на радиоелектронско извидување во Калининград.
Овие вежби се одржаа неколку дена по инцидентот кога полски и НАТО сили пресретнале руски дронови кои влегле во полскиот воздушен простор, што дополнително ја зголеми тензијата во регионот.
