Локацијата на средбата меѓу Владимир Путин и Доналд Трамп е договорена и наскоро ќе биде објавена, изјави помошникот на рускиот претседател, Јуриј Ушаков.
„На предлог на американската страна, во принцип е договорено одржување на билатерален состанок на највисоко ниво меѓу претседателите Путин и Трамп“, рече Ушаков, додавајќи дека во координација со американските колеги веќе се работи на конкретните детали.
Специјалниот претставник на американскиот претседател, Стив Виткоф, предложил и трилатерална средба со украинскиот претседател Зеленски, но Москва не го коментирала тој предлог.
Ушаков нагласи дека Москва веќе започнала да ги информира своите партнери за темите што биле дискутирани за време на состанокот со Виткоф, истакнувајќи дека Трамп веднаш по средбата разговарал со неколку европски лидери.
Состанокот со Виткоф бил конструктивен и се разговарало за заеднички чекори за решавање на украинската криза. Следната недела е посочена како референтен датум за средбата меѓу Путин и Трамп, но времето за подготовка сè уште е неизвесно.
