Двајца мажи се уапсени по масовен напад со нож што се случи вчера во воз на Лондонската североисточна железница (LNER) меѓу Донкастер и Лондон, при што десет лица беа повредени, од кои девет со повреди опасни по живот. Според британската полиција, двајца повредени се во критична состојба, додека четворица веќе се пуштени од болница.
Нападот се случил околу 18:25 часот по локално време, по минувањето на возот низ Питерборо во Кембриџшир. Полицијата примила повици од возот околу 19:40 часот, а вооружени единици го запреле возот на станицата Хантингдон, околу 15 минути возење од Питерборо. Двајцата осомничени – 32-годишен црн британски државјанин и 35-годишен маж со карипско потекло – се уапсени под сомнение за обид за убиство.
Според сведоците, нападот бил хаотичен и траел околу 10 до 15 минути. Патниците трчале и се криеле додека напаѓачот бодел лица по случаен избор. Некои патници биле префрлени во Лондон со автобус, додека на местото на настанот беа испратени бројни екипи за итни случаи, вклучувајќи и хеликоптерска амбуланта.
Премиерот Кир Стармер го нарече нападот „ужасен“ и „длабоко загрижувачки“. Полицијата продолжува со истрагата за мотивите и околностите на инцидентот, соопштувајќи дека засега нема индиции за терористички акт.
