Силен земјотрес со магнитуда од 7,4 степени ја погоди Колумбија, предизвикувајќи сериозни материјални штети и оставајќи луѓе заробени под урнатините.
Најтешка е состојбата во градот Кали, каде според градоначалникот Алехандро Едер се урнале најмалку 20 згради. Градските власти побарале дополнителна помош од спасувачките екипи од Богота и Меделин за да учествуваат во акцијата за пребарување и извлекување на лицата кои останале под урнатините.
Земјотресот предизвикал повредени и значителна материјална штета во повеќе делови на земјата, особено долж пацифичкиот брег. Силното тресење било почувствувано и во Переира, Манизалес и Богота.
Гувернерката на департманот Чоко, Нубија Каролина Кордоба Кури, изјави дека властите се особено загрижени поради последователните потреси. Епицентарот бил регистриран во близина на Сан Хозе дел Палмар, а штети биле пријавени и во главниот град на департманот, Кибдо.
Сериозни последици има и во Рисаралда. Гувернерот Хуан Диего Патињо потврди дека неколку објекти во Переира претрпеле сериозни оштетувања, со урнати фасади и повредени лица.
Земјотресот предизвикал проблеми и во воздушниот сообраќај. Колумбиските воздухопловни власти соопштија дека повеќе аеродроми претрпеле оштетувања, поради што дел од нив привремено го прекинале работењето.
Во главниот град Богота, градоначалникот Карлос Галан соопшти дека засега нема информации за поголема материјална штета.
Силното тресење било почувствувано и во соседна Венецуела, вклучително и во државата Тачира и во Баркисимето.
Американскиот систем за предупредување од цунами соопшти дека по земјотресот нема опасност од цунами.
Спасувачките екипи продолжуваат со пребарување на урнатините, додека колумбиските власти прават проценка на штетите и на бројот на повредени и евентуално загинати лица.
