Данска воведува нови и построги правила во средните училишта со цел да спречи учениците да користат алатки за вештачка интелигенција при пишување есеи, завршни задачи и други писмени работи.
Според новите мерки, учениците ќе треба усно да ја бранат својата писмена работа, при што наставниците ќе можат да ги прашуваат за нивните аргументи, начинот на работа и методите што ги користеле при изработката.
Промените доаѓаат по зголемената загриженост поради користењето генеративни алатки како ChatGPT и Claude за изработка на училишни задачи.
Данскиот министер за образование Магнус Хеунике посочи дека резултатите од неодамнешните писмени испити покажале значителна разлика во оценките во споредба со задачите што учениците ги изработуваат надвор од училиште.
„За првпат по децении гледаме дека кога учениците полагаат писмени испити и ги завршуваат задачите во училиште, има вистински пад на оценките. Ова јасно покажува дека нешто не е во ред“, изјави Хеунике.
Новите правила ќе почнат да се применуваат од следната недела, кога учениците ќе се вратат во средните училишта по летниот распуст.
Една од главните мерки е воведувањето задолжителна усна одбрана на есејот или завршната задача. Секоја година вакви испити полагаат околу 9.000 средношколци.
Покрај тоа, училиштата ќе можат да користат системи за следење на компјутерските екрани за време на писмените испити. Предвидено е и поставување заштитни ѕидови кои ќе го блокираат пристапот до ChatGPT и други слични АИ алатки.
Третата мерка се однесува на начинот на изработка на задачите. Од училиштата ќе се бара да ги поттикнуваат учениците поголем дел од работата да ја завршуваат во училиште, под директен надзор на наставниците.
Од данското Министерство за образование оценуваат дека со ваквиот пристап наставниците полесно ќе можат да го следат процесот на работа, да даваат повратни информации и попрецизно да го проценат знаењето и способностите на учениците.
