Францускиот суд во петокот ја осуди 27-годишната Алжирка Дабија Бенкиред на доживотен затвор без можност за условна слобода, поради силување, тортура и убиство на 12-годишната Лола Давиет. Со оваа одлука, Бенкиред стана првата жена во историјата на Франција која ја добила најстрогата можно казна.
Случајот, кој ја потресе Франција во 2022 година, предизвика и политичка дебата околу имиграцијата, бидејќи осудената немала важечка дозвола за престој. Телото на девојчето беше пронајдено во ковчег во лобито на зградата во која нејзините родители работеа како чистачи.
Претседавачкиот судија ја опиша пресудата како одраз на „исклучителната суровост на делото“, нагласувајќи дека жртвата била подложена на „вистинска тортура“. Обвинителството побара „неотповиклива доживотна казна“, потенцирајќи дека тежината на злосторството бара најстрога реакција на правосудниот систем.
Истражителите утврдија дека Бенкиред ја силувала, мачела и задавила девојчето. На почетокот на судењето таа изрази каење, но експертите психијатри сведочеа дека кај неа се забележани „психопатски тенденции“ и отсуство на лекливо нарушување.
По обелоденувањето на случајот, дел од конзервативните и крајно десничарските политичари го искористија трагичниот настан за барање построги мерки против нелегалната имиграција. Мајката на Лола, пак, ги повика политичарите да престанат да ја злоупотребуваат смртта на нејзината ќерка за политички цели.
