Зголемените геополитички тензии и растечките глобални ризици ја засилуваат загриженоста на граѓаните на Европската Унија за безбедноста и иднината, покажува најновата анкета на Евробарометар.
Според резултатите, речиси три четвртини од Европејците (72%) се загрижени за конфликтите во близина на ЕУ, додека тероризмот (67%), сајбер нападите од трети земји (66%) и последиците од климатските катастрофи (66%) го следат како приоритетни закани. Неконтролираните миграциски текови ги загрижуваат 65% од испитаниците.
Граѓаните исто така го препознаваат ризикот од современите дигитални закани: дезинформациите (69%), говорот на омраза онлајн и офлајн (68%), лажната содржина од вештачката интелигенција (68%) и недоволната заштита на личните податоци (68%) се високо на листата на грижи. Загриженоста се однесува и на слободата на изразување, која 67% ја сметаат за ранлива.
Мнозинството Европејци сакаат ЕУ да дејствува обединето и амбициозно: 89% веруваат дека земјите-членки треба да се координираат во одговорот на глобалните закани, 73% сметаат дека Унијата треба повеќе ресурси за тоа, а 86% сакаат ЕУ да има поизразен глас на меѓународната сцена.
Геополитичките тензии го обликуваат секојдневниот живот на Европејците, покажува анкетата. Повеќе од половина (52%) се песимисти за иднината на светот, 39% за иднината на ЕУ и 41% за својата земја. И покрај тоа, индивидуалниот оптимизам е значително повисок – 76% се надеваат на подобра иднина за себе и своето семејство.
Кога станува збор за приоритетите на Унијата, граѓаните сметаат дека зајакнувањето на одбраната и безбедноста е клучно (40%), следувано од економската конкурентност и индустријата (32%) и енергетската независност (29%). „Граѓаните очекуваат ЕУ да ги заштитува и да дејствува заедно. Тоа бара посилна и посамостојна Европа“, изјави претседателката на Европскиот парламент, Роберта Мецола.
На домашен фронт, инфлацијата и високите трошоци за живот се најголема грижа за 41% од граѓаните, а економијата и работните места се приоритет за 35%, што е зголемување од пет поени во однос на мај 2025 година. Сепак, голем дел од Европејците очекуваат нивниот животен стандард да остане стабилен во наредните пет години, иако 28% предвидуваат намалување, со највисоки проценти во Франција (45%), Белгија и Словачка (по 40%).
Што се однесува до вредностите што треба да ги брани ЕУ, мирот е највисок приоритет за 52%, следен од демократијата (35%), слободата на говор (23%), човековите права (22%) и владеењето на правото (21%).
И покрај мал пад на довербата, ставовите кон ЕУ остануваат позитивни: 49% од Европејците имаат поволна слика за Унијата, додека 62% сметаат дека членството на нивната земја во ЕУ е добра работа. Младите од 15 до 30 години се особено оптимистични и имаат повисоки очекувања од Унијата.
