Европската унија размислува за нов пристап во санкционирањето на Русија, кој предвидува мали, постојани и конкретни мерки, наместо да се потпира само на големи пакети рестриктивни мерки. Шефицата на европската дипломатија, Каја Калас, изјави дека се подготвува 20-ти пакет санкции, додека истовремено се разгледуваат континуирани акции, особено насочени кон руската флота која се обидува да ги заобиколи постојните ограничувања.
– Неопходно е постојано да се врши притисок врз Русија со санкции – додаде Калас, нагласувајќи дека слични мерки веќе покажале ефект врз извозот на руска нафта.
Претходниот, 19-ти пакет санкции стапи на сила во октомври и беше насочен кон намалување на приходите на Русија од гас и нафта, додека целосна забрана за увоз на течен природен гас од Русија е планирана за 2027 година – една година порано од првичниот план.
Калас потенцираше дека целта на ЕУ не е само воведување големи пакети санкции, туку и поголема флексибилност преку мали, таргетирани мерки за постојан и ефективен притисок врз Русија.
