Планот на американскиот претседател Доналд Трамп за Украина предвидува безбедносни гаранции по примерот на Член 5 од НАТО, што значи дека напад врз Украина ќе се третира како напад врз целата трансатлантска заедница. Ова, како што покажува нацрт-документот добиен од Аксис, би ги обврзало САД и европските сојузници да реагираат во случај на напад.
Сепак, планот бара болни отстапки од Украина: предвидено е отстапување на повеќе територии отколку што Русија моментално ги контролира, воспоставување демилитаризирана зона, укинување на санкции кон Русија и амнестија за воени злосторства.
Безбедносните гаранции би важеле десет години и би вклучувале можност за вмешување на вооружените сили. Документот бара потписи од Украина, САД, ЕУ, НАТО и Русија, што практично ја обврзува Америка да ја брани Украина во случај на нов конфликт, предизвикувајќи веројатни реакции од сојузниците на Трамп.
