Европскиот туристички сектор предупредува дека воведувањето на новиот систем за влез и излез (ЕЕС) може да има сериозни последици врз бројот на посетители во Шенген-зоната, доколку патниците се соочуваат со долги чекања на граничните премини.
Според анализата на Светскиот совет за патувања и туризам (WTTC), редовни задржувања од три до четири часа при влез во земјите од Шенген би можеле да доведат во прашање дури 41 милион туристички посети, како и туристичка потрошувачка во вредност од 45,4 милијарди долари.
Истражувањето спроведено меѓу повеќе од 2.500 патници од Велика Британија, САД, Канада и Австралија покажува дека околу една третина од испитаниците би имале многу помала веројатност да ја изберат Европа како туристичка дестинација доколку долгите редици на границите станат секојдневна појава.
Најголема загриженост изразиле британските патници. Дури 39 проценти од нив изјавиле дека би ја преиспитале одлуката за патување доколку чекаат повеќе од три часа на граничните премини. Кај патниците од САД и Канада тој процент изнесува 33 отсто, додека 27 проценти од Австралијците би реагирале на ист начин.
Од WTTC истакнуваат дека новиот ЕЕС систем претставува важен чекор кон модернизација на граничните контроли и зајакнување на безбедноста, но предупредуваат дека неговото воведување мора да биде внимателно испланирано.
„Предизвикот не е дали ЕЕС треба да се спроведе, туку како владите, граничните власти и туристичкиот сектор ќе соработуваат за да обезбедат што е можно понепречено искуство за патниците“, изјави претседателката и извршна директорка на WTTC, Глорија Гевара.
Истражувањето покажува и дека поголемиот дел од патниците немаат отпор кон новата технологија. Откако биле запознаени со начинот на функционирање на системот, 65 проценти од испитаниците изразиле поддршка за ЕЕС, додека само шест проценти имале негативен став кон употребата на биометриски гранични контроли.
Експертите предупредуваат дека успехот на новиот систем нема да зависи само од технолошките решенија, туку и од способноста на европските земји да обезбедат брз и ефикасен проток на патници, без дополнителни оптоварувања за туристичкиот сектор, кој претставува една од најважните гранки на европската економија.
