Европската комисија ја поздрави најавата на САД за енергетско примирје меѓу Русија и Украина, но оцени дека засега нема знаци оти Москва го почитува.
Портпарол на Комисијата на прес-конференција посочи дека украинскиот претседател Володимир Зеленски изразил подготвеност да се придржува до примирјето, додека руските напади врз Украина продолжуваат.
„За жал, не гледаме знаци дека Русија го почитува таквиот договор“, изјави портпаролот, додавајќи дека Комисијата нема дополнителни информации освен објавената изјава.
Тој нагласи дека Европската Унија и САД продолжуваат со напорите за завршување на војната во Украина.
Одговарајќи на прашање за евентуално укинување на ограничувањата за увоз на руски фосилни горива, портпаролот посочи дека Европа го довршува процесот на намалување на зависноста од нив.
