Кривичниот суд во Каиро донесе одлука за внесување 35 организации и 36 лица на египетските листи на терористички организации и лица за период од пет години. Меѓу нив е наведена и организација од Македонија, под називот „Islamic Youth Assembly“, односно „Исламско младинско здружение“, објави египетската државна новинска агенција МЕНА.
Одлуката е објавена на 10 ноември во египетскиот службен весник. Списокот опфаќа исламски здруженија, институции и совети од повеќе европски држави, меѓу кои Франција, Германија, Велика Британија, Швајцарија, Албанија и Босна и Херцеговина.
Засега нема независна потврда за точниот регистриран назив, седиштето и актуелниот правен статус на организацијата од Македонија наведена во египетскиот список. Само врз основа на преводот на името не може со сигурност да се идентификува конкретно домашно здружение.
На официјалната страница на европската младинска мрежа ФЕМИСО како членка од Македонија е наведена „Forumi Rinor Islam – FRI“, со англиски назив „Islamic Youth Forum“. Овој податок сам по себе не потврдува дека станува збор за организацијата опфатена со египетската одлука.
Во досега објавените информации не се наведени конкретни докази или посебно образложение за организацијата означена како македонска. Станува збор за внесување на египетската национална листа, што не значи автоматско прогласување на наведените организации за терористички во Европската Унија.
