Украина се соочува со најтешката енергетска криза од почетокот на војната. Масирани руски напади ноќеска го оштетија електроенергетскиот систем, а нуклеарната електрана Запорожје накратко остана целосно без надворешно напојување – сценарио што меѓународните експерти одамна го означија како „најопасното можно“.
Премиерката Јулија Свириденко потврди дека во регионот Запорожје се оштетени повеќе енергетски објекти, а најмалку десет населби останале без струја. Веднаш бил одржан итен состанок со енергетските служби, а активирани се генератори за да се обезбеди водоснабдување и основна инфраструктура.
Запорожската нуклеарка неколку часа функционирала на резервни дизел генератори, откако системите за заштита ги исклучиле двата далековода што ја снабдуваат централата. Прекинот сѐ уште се истражува, но експертите предупредуваат дека повторувањето на вакви сценарија го зголемува ризикот од нуклеарен инцидент.
Свириденко предупреди на нови, чести и непредвидливи рестрикции низ целата земја поради обемните дефекти.
Зеленски: Русија го гаѓаше сѐ што има врска со струја
Украинскиот претседател Володимир Зеленски изјави дека цел на нападите биле токму енергетските објекти. Според него, употребени се над 650 дронови и 51 ракета, меѓу кои и аеробалистички и балистички проектили. Погодени биле Киев, Дњепропетровск, Чернихив, Запорожје, Одеса, Лавов, Волин и Николаев. Во Фастив е оштетена главната железничка станица.
„Нападот беше бесмислен од воена гледна точка, но со огромни последици за цивилите,“ порача Зеленски, барајќи силна меѓународна реакција и нов пакет санкции.
МААЕ: Чернобилскиот штит НЕ ГО СТОПИРА РАДИЈАЦИСКОТО ЗРАЧЕЊЕ
Меѓународната агенција за атомска енергија објави предупредување – челичниот саркофаг над реакторот број 4 во Чернобил, изграден за да ја блокира радијацијата, повеќе не ја извршува својата клучна функција.
Инспекцијата потврди дека ударот со дрон во февруари, за кој Украина ја обвинува Русија, ја оштетил структурата до степен што итните поправки не се доволни. Потребна е целосна реконструкција, а ситуацијата се оценува како „потенцијално опасна за регионот“.
Според извештајот на ОН, дронот носел високоексплозивна боева глава, предизвикал пожар и ја оштетил заштитната обвивка на нуклеарната постројка.
Украина влегува во зима со сериозно оштетена енергетска мрежа, ризични нуклеарни постројки и најмасовни напади во последните месеци.
