Осум лица, меѓу кои и претседателот на турскиот прволигаш Ејупспор, Мурат Озкај, се уапсени под сомнение за наместени натпревари и нелегално обложување. Истовремено, Турската фудбалска федерација (ТФФ) суспендираше вкупно 1.024 фудбалери и отвори дисциплински постапки против нив.
Скандалот се проширува откако минатата недела беа привремено отстранети и 149 судии поради обложување на резултати. Меѓу суспендираните играчи има 27 од клубови во Првата турска лига, вклучувајќи фудбалери од Галатасарај и Бешикташ.
Поради големиот број суспендирани, ТФФ побара од ФИФА вонреден 15-дневен трансфер-период за да им се овозможи на клубовите да ги дополнат своите состави. Дополнително, натпреварите во Втората и Третата лига се ставени во мирување на две недели.
