Во голема полициска операција спроведена на 28 октомври во Рио де Жанеиро биле убиени 117 лица, но без да бидат уапсени водачите на криминалната група „Командос вермеља“, кои биле главна цел на акцијата, пренесува Ројтерс.
Според полицискиот извештај, меѓу убиените не се наоѓаат 69-те лица кои претходно биле именувани како осомничени и чии имиња биле основа за поднесување на жалбата што ја активирала операцијата. Само петмина од нив биле уапсени, а ниту еден од нив не бил висок член на бандата.
Секретарот за јавна безбедност на Рио, Виктор дос Сантос, изјави дека операцијата била насочена кон апсење на организаторите, но дека „не е лесно да се пронајдат 69 лица во заедници со околу 280.000 жители“.
Акцијата повторно ја отвори дебатата во Бразил за методите на полицијата и високите бројки на загинати во антимафијашките операции.
