Градоначалникот на општина Битола, Тони Коњановски, денес организираше свечен прием за учениците од Гимназијата „Јосип Броз Тито“, кои станаа државни прваци во кошарка 3×3 во машка конкуренција.
Во натпревар во кој учествуваа 93 средни училишта од цела Македонија, кошаркарскиот тим составен од Наум Марковски (III⁴), Благојче Димитровски (III²), Лео Созовски (II³) и Благој Тарашовски (II¹) го освои првото место, донесувајќи голема радост и гордост за својата гимназија и родниот град.
Градоначалникот Коњановски лично им честиташе на младите спортисти и им врачи признанија, истакнувајќи дека нивниот успех е доказ дека трудот, дисциплината и тимската работа секогаш се исплатуваат.
„Горди сме на вас. Вашиот успех е мотив повеќе за сите млади во Битола да продолжат да се занимаваат со спорт и да се стремат кон врвни резултати“, изјави Коњановски.
Посебна благодарност беше упатена и до професорот Антонио Трпковски, кој го подготви тимот, како и до директорката на Гимназијата, Лидија Споа, за континуираната поддршка и создавање услови за развој на младите таленти.
Овој триумф на битолските средношколци претставува уште еден доказ за посветеноста на младите и за важноста на спортот во образовниот систем.
