Ноќеска околу 3 часот по полноќ бил запален и целосно уништен автомобилот на Ѓорѓи Галетановски – Чомбе, претседател на скопската организација на СДСМ и поранешен директор на Зоолошката градина. Возилото било паркирано пред неговата зграда во населбата Кисела Вода.
Противпожарна екипа интервенирала и го изгаснала пожарот.
„Некоj намерно го запалил автомобилот, го виделе како бега. Бил слаб, висок, со дуксер. Апелирам до МВР и до министерот за внатрешни работи што побрзо да го фатат сторителот“, изјави Галетановски.
СДСМ го осуди настанот:
„Со доаѓањето на ВМРO-ДПМНЕ на власт безбедноста на граѓаните е сериозно загрозена. МВР наместо да се занимава со тоа како лица блиски до ВМРО-ДПМНЕ да земат милионски тендери нека земе конечно нешто да работи. Бараме МВР и сите надлежни институции веднаш да постапат, целосно да го расчистат случајот и сторителите да одговараат“, соопшти СДСМ.
