Зијадин Села на пат кон ВЛЕН? Меџити открива турбуленции во албанската политика

Новиот градоначалник на Чаир, Изет Меџити од ВЛЕН, најави дека коалицијата „Национална алијанса за интеграција“ (НАИ), предводена од ДУИ, ќе биде распуштена по локалните избори и дека се очекуваат структурни промени во редовите на интегративците.

Во ТВ гостување на ТВ 21, Меџити посочи дека НАИ се надеваше да го задржи гласачкото тело по заминувањето на Арбен Таравари, но резултатите од првиот круг ги демантираа тие очекувања. „Со заминувањето на Таравари пред шест месеци, мислеа дека имаат 90 отсто од гласачите, но тоа не се случи. Сега се чувствува загуба на надеж“, рече Меџити, додавајќи дека дел од гласачите на НАИ веќе започнале преговори за приклучување кон ВЛЕН.

Во однос на шпекулациите дека лидерот на едното крило на Алијансата за Албанците, Зијадин Села, би можел да се приклучи во Владата, Меџити истакна дека тоа не може да се исклучи. „Политичката сцена кај албанските партии е измешана, се случија многу турбуленции и мислам дека ќе има уште турбуленции“, заклучи тој.