Претседателката Гордана Сиљановска-Давкова свика седница на Советот за безбедност која ќе се одржи утревечер, поради актуелната безбедносна состојба и случувањата на меѓународен план.
Според информациите, на седницата ќе се разгледуваат прашања поврзани со регионалната стабилност, безбедносните ризици и можните импликации врз државата, во услови на зголемени глобални тензии.
Советот за безбедност е највисокото советодавно тело во државата за прашања од областа на безбедноста и одбраната, а со него претседава претседателот на државата. Во негов состав членуваат претседателот на Собранието, премиерот, министрите за внатрешни работи, одбрана и надворешни работи, како и тројца членови именувани од претседателот.
Седниците на Советот вообичаено се одржуваат зад затворени врати, а по нив се соопштуваат заклучоци и препораки за натамошно постапување на институциите.
