Пратеникот Илир Демири официјално го информираше претседателот на Собранието Африм Гаши дека од денес ќе дејствува како независен пратеник. Неговата промена е веднаш евидентирана и на официјалната веб-страница на Собранието, каде што Демири веќе фигурира како независен, иако во делот за коалициска припадност сè уште стои „Европски фронт“.
Демири беше дел од пратеничката група на Европскиот фронт и во собраниските клупи влезе од шестата изборна единица како кадар на Алијансата за Албанците од крилото на Зијадин Села. Ова крило настапи во коалиција со ДУИ на последните парламентарни избори.
Одлуката да се оддели доаѓа непосредно по најавата на Села дека ја напушта коалицијата со ДУИ, што ја продлабочи политичката дистанца меѓу двете страни.
Илир Демири претходно ја извршуваше функцијата министер за здравство во периодот од февруари до јуни 2024 година.
