Од почетокот на годинава до 27 ноември во Македонија се регистрирани 38 нови случаи на ХИВ/СИДА, што е за 25,5 проценти помалку во однос на истиот период лани, кога биле евидентирани 51 случај. Податоците се од најновиот извештај на Институтот за јавно здравје, објавен по повод Светскиот ден за борба против СИДА.
Во извештајот се наведува дека во текот на оваа година се регистрирани и осум смртни случаи поврзани со болеста. Вирусот и понатаму доминантно ја погодува машката популација – од 38-те нови случаи, 37 се мажи, а само едно лице е жена. Просечната возраст на новооткриените е 35 години, а најголем дел од заразените се млади на возраст од 20 до 39 години.
Според анализата на начинот на пренос, кај 29 случаи се утврдени инфекции во рамките на МСМ-популацијата (мажи кои имаат сексуални односи со мажи), додека кај пет лица е регистриран хетеросексуален пренос.
ИЈЗ посочува дека Македонија и понатаму спаѓа во земјите со ниска преваленца, но предупредува дека долгорочно се забележува растечки тренд. Дури 32 проценти од вкупно 726 регистрирани случаи од 1987 година до денес се откриени во последните пет години. Институтот дополнително истакнува дека во последната деценија 72,8 проценти од сите нови случаи се кај мажи кои имале секс со мажи.
