Македонија се соочува со сериозна пожарна ситуација – во моментов се активни 12 пожари низ различни региони, додека пет од нив се ставени под контрола, информира Центарот за управување со кризи (ЦУК).
Најзагрозени се подрачјата во општините Василево, Радовиш, Берово, Прилеп, Кавадарци, Македонски Брод, Желино, Петровец, Зелениково, Крива Паланка, Куманово и Старо Нагоричане. Најчесто се зафатени нискостеблести шуми, грмушки, деградирана дабова шума и висока борова вегетација.
Еден од најактивните пожари се шири кај селото Бешиште (Прилеп), движејќи се кон границата со Грција. Во Кавадарци, пожарот кај с. Галиште е проширен, додека оној меѓу Царевиќ и Смолани е ставен под контрола. Во Желино и Македонски Брод се бележат пожари со сериозен интензитет во планински и рурални делови.
ЦУК информира дека под контрола се ставени пожарите кај:
селата Грешница и Латово (Македонски Брод), с. Баница и населбата Софилари (Струмица), с. Јунузлија (Карбинци) и меѓу селата Драгоево и Селце (Штип).
Надлежните служби се постојано на терен со поддршка од доброволци и локално население. Апелите за внимателност се зголемени, особено за избегнување палење огнови на отворено.
Пожарната сезона ова лето се заканува да стане една од најтешките во последните години, со оглед на сувото време и ограничените ресурси. Надлежните институции ги повикуваат граѓаните на одговорност, будност и соработка.
