По топлите и сончеви денови, Македонија од утре, вторник 17 март, ќе биде под влијание на зимски циклонски систем со центар над Јонско Море. Овој ладен циклон ќе донесе повеќе облачност, повремени локални врнежи од дожд, кои на моменти ќе бидат пообилни, проследени со повремено засилен ветер од југоисточен, а во западните предели од североисточен правец.
Поради пониските температури, на планините и во скијачките центри се очекуваат врнежи од снег и формирање снежна покривка. Снежната граница повремено ќе се спушта и под 1.000 метри надморска височина, што значи дека повремени врнежи од снег ќе има и во повисоките населени места и во дел од градовите, особено во западните и северните региони.
Во Скопје и околината се очекува повеќе облачност и повремени врнежи од дожд, додека на околните планини врнежите ќе бидат од снег. Температурите значително ќе се намалат, а ќе дува засилен ветер од југоисточен правец.
