Македонската алијанса за европска интеграција (МАЕИ), во соработка со „Ротари клуб“ од Битола, и оваа година организираше новогодишна хуманитарна акција со која ги израдува децата од Општина Пустец.
Советникот во Советот на Општина Пустец од редовите на МАЕИ, Јордан Јанкула, денеска им додели новогодишни подароци на децата од градинките, како и на учениците од деветолетката „Отпорот на Горичените“ во селото Долна Горица. Ова училиште ги опфаќа учениците од селата Горна Горица, Долна Горица, Глобочани и Туминец.
Јанкула истакна дека подароците се обезбедени како резултат на долгогодишната и успешна соработка меѓу МАЕИ и „Ротари клуб“ од Битола, чија заедничка цел е поддршка на децата и придонес кон нивен правилен развој и среќно детство.
