На Светскиот економски форум во Давос, премиерот Христијан Мицкоски претстави амбициозна енергетска стратегија на Македонија, која има за цел да ја позиционира земјата како атрактивна дестинација за странски инвестиции и развој на технологијата за вештачка интелигенција.
„За развој на дата-центри за вештачка интелигенција е потребно стабилно и одржливо снабдување со енергија. Македонија го обезбедува токму тоа“, рече Мицкоски пред инвеститорите, истакнувајќи дека владата е подготвена да ја преземе целата институционална одговорност за ризиците, како поттик за инвеститорите.
Клучните проекти вклучуваат изградба на гасни конектори со Грција и Србија, кои ќе овозможат капацитет од 8 милијарди кубни метри гас годишно. Дополнително, Македонија планира три големи хидроенергетски проекти на Црна Река, со вкупна вредност од 2 милијарди евра. „Овие проекти не се важни само за нас, туку за целиот регион. Тие ќе обезбедат чиста вода за пиење и ќе го зајакнат земјоделството во познатиот Тиквешки регион, кој се наоѓа низ каскадата на Црна Река“, објасни премиерот.
