Европската Унија ги отфрли предлозите на превозниците од Западен Балкан за олеснување на престојот на професионалните возачи во Шенген зоната и им порача дека мора да се придржуваат до правилото 90 дена престој во период од 180 дена.
Претставниците на транспортните здруженија оценуваат дека ваквата одлука сериозно ќе го погоди нивното работење, бидејќи поради природата на професијата возачите многу брзо го достигнуваат дозволениот лимит и ризикуваат забрана за влез во ЕУ.
Одбиени сите компромисни решенија
Брисел ги отфрлил сите предлози од регионот, меѓу кои и барањето работното време во транзит да не се пресметува во престојот или воведување посебен статус за професионалните возачи. Како единствена опција било посочено добивање долгорочни визи од земја-членка, што превозниците го оценуваат како неприфатливо и ризично за нивниот бизнис.
Најавени нови протести
Транспортните компании од Србија, Босна и Херцеговина, Црна Гора и Северна Македонија веќе одржаа блокади на товарните премини кон крајот на јануари, а по последниот одговор од ЕУ најавуваат можни нови акции и затворање на гранични премини.
Точниот датум на евентуалните блокади сè уште не е утврден, бидејќи се очекува координација меѓу превозниците од целиот регион.
Закана за транспортниот сектор
Превозниците предупредуваат дека строгата примена на правилото 90/180 може да доведе до намалување на бројот на активни возачи, пад на приходите и нарушување на синџирите на снабдување меѓу ЕУ и Западен Балкан.
